Ҳамватанони азиз!

Ҳамаи шумо ва ҳамватанони бурунмарзиро ба муносибати фарорасии Соли нави мелодии 2026 самимона табрик мегӯям.

Ба ҳар як хонадони мардуми шарифу сарбаланди кишвар тандурустиву иқболи нек ва рӯзгори орому осуда орзу менамоям.

Соли мелодие, ки сипарӣ шуда истодааст, барои Тоҷикистони маҳбуби мо боз як соли бобарору таърихӣ ва соли дастоварду пешравиҳои назаррас гардид.

Бо вуҷуди шароити ҳассосу мураккаби ҷаҳони муосир ва таъсири манфии омилҳои берунӣ мо дар соли 2025 ҳам дар сиёсати дохилӣ ва ҳам дар самти сиёсати хориҷӣ ба як қатор дастоварду нишондиҳандаҳои қобили мулоҳиза ноил гардидем.

Ин дастоварду пешравиҳо чанд рӯз пеш дар паёми Роҳбари давлат ба таври муфассал таҳлилу баррасӣ карда шуданд.

Ба шарофати сулҳу оромӣ, суботи комили сиёсӣ, ваҳдати миллӣ ва заҳмати содиқонаи мардуми шарифи кишвар рушди устувори иқтисоди миллӣ таъмин гардид.

Барномаву нақшаҳои муҳимме, ки дар доираи ҳадафҳои стратегии миллӣ қабул шудаанд, дар соли 2025 бомаром амалӣ гардида, ба рушди соҳаҳои иқтисодиву иҷтимоии мамлакат такони ҷиддӣ бахшиданд ва мо ба ҳадафҳои гузоштаамон хеле наздик шудем.

Интихоботи даъвати нави Маҷлиси намояндагон, маҷлисҳои маҳаллӣ ва Маҷлиси миллии Маҷлиси Олӣ, ки бо иштироки фаъолонаи интихобкунандагон, яъне мардуми шарифи Тоҷикистон баргузор гардиданд, рӯйдоди муҳимми сиёсии соли сипаришудаистода мебошад.

Ин чорабинии муҳимми сиёсӣ ба рушди сиёсати дохилии кишвар мусоидат карда, боиси дар арсаи байналмилалӣ боз ҳам боло рафтани обрӯи давлати тоҷикон ҳамчун давлати демокративу ҳуқуқбунёд ва дунявӣ гардид.

Мардуми кишвар, аз ҷумла соҳибкорон ва шахсони саховатпеша содиқона ва софдилона заҳмат кашида, корҳои созандаву бунёдгаронаро вусъати бесобиқа бахшиданд ва ҳазорҳо иншооти истеҳсоливу иҷтимоӣ, аз ҷумла коргоҳу корхонаҳои саноатӣ, роҳу пулҳо, кӯдакистону мактабҳо ва муассисаҳои тиббиву хизматрасонӣ бунёд карданд.

Дар ин лаҳзаҳои идона ба кулли мардуми ватандӯсту шарофатманди кишвар, соҳибкорон ва ҳамаи онҳое, ки дар раванди созандагиву ободонии сарзамини аҷдодӣ саҳм гузоштаанд, самимона сипосу миннатдорӣ баён менамоям.

Ҳамчунин, мехоҳам хотирнишон намоям, ки ба мақсади боз ҳам баланд бардоштани ҳувияти миллӣ, тарбияи ватандӯстӣ ва худогоҳиву хештаншиносии мардум ва дар навбати аввал, наврасону ҷавонон «Шоҳнома»-и безаволи Абулқосими Фирдавсӣ нашр ва ба ҳар як оилаи мамлакат дастрас карда шуд.

«Шоҳнома» сарчашмаи ҷовидонаи арзишҳои ҳувиятсози миллӣ ва афкору андешаҳои ватандӯстиву истиқлолхоҳии тоҷикон мебошад ва бовар дорам, ки он ба таҳкиму тақвияти ҳисси миллии тамоми қишрҳои ҷомеаи мо такони ҷиддӣ мебахшад.

Тақвияти ҳувият ва ҳисси миллӣ, ватандӯстиву ватанпарастӣ ва ҳимояи истиқлолу озодӣ барои мо амри ниҳоят муҳим мебошад.

Зеро дар шароити ҷаҳонишавӣ вазъе ба амал омадааст, ки ба арзишҳои миллӣ хатарҳои зиёд таҳдид мекунанд.

Маҳз ба ҳамин хотир, мо соли 2026-умро Соли вусъат додани корҳои ободониву созандагӣ ва тақвияту таҳкими ҳувият ва худшиносиву худогоҳии миллӣ эълон намудем.

Соле, ки сипарӣ шуда истодааст, барои мо аз лиҳози дастгирии ташаббусҳои байналмилалии кишварамон низ соли бобарору хотирмон гардид.

Илова ба ибтикороти солҳои қаблӣ имсол низ аз ҷониби Маҷмаи Умумии Созмони Милали Муттаҳид якчанд пешниҳоди Тоҷикистон ва танҳо 12-уми декабр ду ташаббуси он бо қабули қатъномаҳо пазируфта шуданд.

Ҳамватанони азиз!

Дар ин лаҳзаҳои идона мехоҳам бо ифтихору сарфарозӣ изҳор намоям, ки тамоми комёбиҳои то имрӯз бадастомада, пеш аз ҳама, самараи истиқлолу озодӣ, сулҳу оромӣ ва ваҳдати миллӣ мебошад.

Ҳамчунин, бо самимият иброз медорам, ки мо ба чунин рӯзҳои орому осуда ва дастоварду пешравиҳо маҳз дар натиҷаи азму талошҳои ватандӯстонаи сокинони кишвар ва пуштибонии онҳо аз сиёсати пешгирифтаи давлату Ҳукумати мамлакат муяссар гардидем.

Соле, ки фаро мерасад, ҳам аз лиҳози сиёсӣ ва ҳам аз нигоҳи иқтисодиву иҷтимоӣ соли хеле муҳим – 35-солагии истиқлоли давлатии Тоҷикистони азизамон мебошад ва мо бояд ба ифтихори ин ҷашни бузург корҳои азимро ба анҷом расонем.

Дар робита ба ин, аз ҳар як фарди бонангу номуси ҷомеа ва тамоми мардуми заҳматқарини кишвар даъват ба амал меоварам, ки барои боз ҳам ободу зебо гардонидани Ватани маҳбубамон, пешрафти давлати соҳибистиқлоламон, яъне ба хотири ватансозиву давлатсозӣ ва боз ҳам беҳтар гардонидани шароити зиндагии ҳар як оилаи мамлакат беш аз ҳар вақти дигар талошу кӯшиш намоянд.

Ҳамватанони азизи мо аз воқеаву рӯйдодҳои ҷаҳони нобасомону пурҳаводиси имрӯза хуб огоҳанд.

Ин равандҳо ҳар фарди ватандӯсту ватанпараст, бонангу номус, худогоҳу хештаншинос ва кулли мардуми кишварро ҳушдор медиҳанд, ки тамоми саъю талоши худро ба хотири ҳимояи истиқлолу озодӣ, таҳкими сулҳу оромӣ, суботи сиёсӣ, ваҳдати миллӣ ва рушду тараққиёти давлати соҳибистиқлоли тоҷикон сафарбар созанд.

Дар шароити рушди бесобиқаи илму техника ва технологияҳо мо бояд ба тарбияи фарзандон, яъне наслҳое, ки ояндаи миллат ва Ватан мебошанд, эътибори аввалиндараҷа диҳем ва барои онҳо шароити беҳтарини таълимро муҳайё намоем.

Мо бояд ҳарчи бештар коргоҳу корхонаҳои истеҳсолӣ бунёд карда, барои ҳамватанонамон ҷойҳои корӣ таъсис диҳем.

Бовар дорам, ки дар ин самт соҳибкорону сармоягузорони бонангу номуси ватанӣ минбаъд низ фаъолона саҳм мегузоранд.

Бо эътимоди комил иброз медорам, ки ҳамаи мо – хурду бузурги Тоҷикистони биҳиштосо бо иттиҳоду сарҷамъӣ Ватани аҷдодии худро ободу зебо, давлати соҳибихтиёри хешро неруманду пешрафта мегардонем ва нуфузу обрӯи онро дар арсаи байналмилалӣ боз ҳам баланд мебардорем.

Бо чунин ниятҳои нек бори дигар кулли мардуми шарафманди Тоҷикистон ва ҳамватанони бурунмарзиро бо фарорасии соли нави мелодии 2026 самимона табрик гуфта, ба ҳар як хонадони кишвар, пеш аз ҳама, саломативу хушбахтӣ, файзу баракати зиндагӣ ва ба Тоҷикистони маҳбубамон пешрафту ободии боз ҳам бештарро орзу менамоям.

Соли нави мелодии 2026 муборак бошад, ҳамватанони азиз!

https://president.tj/event/news/54490

Ҳамдиёрони азиз, олимону кормандони гиромӣ!

Ҳамаи Шумо ва дар симои Шумо ҳамватанони азизамонро ба муносибати фарорасии Соли нави мелодии 2026 самимона табрик гуфта, ба хонадони ҳар яки Шумо рӯзгори ободу иқболи нек орзу менамоям.

Соли 2025 воқеан ҳам зери сиёсати хирадмандона ва созандаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои мардуми шарифи Тоҷикистон аз бисёр ҷиҳат соли воқеан хотирмону таърихӣ ба ҳисоб меравад. Зеро кишвари азизи мо дар ин сол ба дастоварду пешравиҳои басо муҳимму назаррас ноил гардид. Дар соли сипаригашта таҳти сиёсати хирадмандонаи Пешвои муаззами миллат муҳтарам Эмомалӣ Раҳмон дар тамоми соҳаҳои фаъолияти иҷтимоию иқтисодӣ, илмию фарҳангӣ, варзишиву техникӣ дастовардҳои беназир ба даст омадаанд.

Воқеан ҳам соли сипаригашта барои олимону кормандони Академияи миллии илмҳои Тоҷикистон соли хотирмон буд. Дар тамоми самтҳои фаъолияти илмю таҳқиқотӣ дастовардҳои назаррас рӯйи кор омаданд. Дар давоми соли сипаригардида дар заминаи Институтҳои химия, физикаю техника, биологии Помир, Маркази илмии Хуҷанд, Институти масъалаҳои об, Маркази омӯзиши пиряхҳо, Маркази рушди инноватсия дар маҷмуъ 19 озмоишгоҳҳои наву замонавӣ бо технологияҳои мосир муҷаҳаз гардонида шуданд. Инчунин, яке аз дастовардҳои арзишманди соли сипаригардида дар Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ин пешниҳоди табдили Муассисаи давлатии илмиву таҳқиқотии «Маркази омӯзиши пиряхҳои Академияи миллии илмҳо» ба Муассисаи давлатии илмиву таҳқиқотии «Институти омӯзиши пиряхҳо ва криосфераи Академияи миллии илмҳо» мебошад. Ҳамзамон пешниҳоди бунёди Маркази тамаддуни ориёӣ ва Маркази байналмилалии Наврӯз дар шаҳри Душанбе идомаи ташаббусҳои Пешвои миллат муҳтарам Эмомалӣ Раҳмон ҷиҳати таҳкими эътимоду эътирофи тоҷикон ҳамчун миллати тамаддунофар мебошад.

Боварии комил дорам, ки олимону кормандони Академияи миллии илмҳои Тоҷикистон, инчунин, мардуми шарифи кишвари азизам-Тоҷикистон дар соли нави мелодии 2026 дар пешбурд ва амалисозии сиёсати илмпарварона ва бунёдкоронаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, инчунин, пойдории сулҳу субот дар ҷомеаи соҳибистиқлол аз пештара бештар пешраву пешсаф мегарданд.

Илова бар ин, ҳифзи истиқлолу озодии Тоҷикистони маҳбубамон ва дастовардҳои он – сулҳу оромӣ, суботи сиёсӣ ва ваҳдати миллӣ бояд қарзи инсонӣ, вазифаи шаҳрвандӣ ва рисолати имонии ҳар як фарди бонангу номус ва ватандӯсту ватанпарасти ҷомеа бошад.

Бигзор, соли нави 2026 дар роҳи фардои зиндагиямон саодати абадӣ, корнамоиҳои шуҳратманд, дастовардҳои эҷодӣ ва ибтикороти шоёнро паём оварад!

Соли нави мелодӣ муборак!

Муҳтарам кормандони мақомоти амнияти миллӣ, собиқадорон ва ходимони фидоии Ватан!

Ҳамаи Шуморо ба муносибати иди касбии «Рӯзи кормандони мақомоти амнияти миллӣ» сидқан табрик намуда, барои фаъолияти софдилона, ҷасурона ва пурмасъулиятатон ба хотири ҳифзи амнияти давлату ҷомеа, суботу оромӣ ва таъмини ҳаёти осоиштаи шаҳрвандони кишвар изҳори сипос менамоям.

Мақомоти амнияти миллӣ дар қатори дигар сохторҳои муҳими давлатӣ нақши калидӣ дошта, дар таҳкими пояҳои давлатдорӣ, ҳифзи манфиатҳои миллӣ, пешгирии хатару таҳдидҳои замони муосир, аз ҷумла зуҳуроти экстремистию террористӣ, ҷиноятҳои муташаккил ва дигар зуҳуроти номатлуб, саҳми арзанда мегузорад. Фаъолияти муназзаму масъулиятноки Шумо имкон фароҳам овард, ки фазои ороми сиёсӣ, ваҳдати миллӣ ва рушди устувори иқтисодиву иҷтимоии мамлакат ҳифз ва таъмин карда шавад.

Дар баробари ин, ҷасорату матонат, садоқат ба савганди хизмати давлатӣ ва омодагии доимии шумо барои ҳимояи марзу буми кишвар, рамзи ватандӯстӣ ва худогоҳии баланди шаҳрвандист. Итминон дорам, ки минбаъд низ бо донишу таҷрибаи ғанӣ, интизом ва масъулияти баланд ба иҷрои рисолати пуршарафи худ идома дода, дар татбиқи ҳадафҳои стратегии давлат ва таъмин кардани амнияти миллӣ нақши арзишманд мегузоред.

Бо истифода аз ин фурсати муборак ба тамоми кормандон ва собиқадорони мақомоти амниятии миллӣ саломатии бардавом, хонаободӣ, муваффақиятҳои нав дар фаъолияти хизматӣ ва барору комёбиҳои бештари минбаъда орзу менамоям. Бигзор заҳматҳои софдилона ва хизмати ватандӯстонаи шумо ҳамеша қадршиносӣ гардад ва ба манфиати миллату давлати азизамон равона бошад.

Иди касбӣ муборак!

19-уми декабр яке аз шахсиятҳои барҷаста ва ҷавонони сарбаланди кишвар, пайрави асили сиёсати хирадмандона, созанда ва бунёдкоронаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Раиси Маҷлиси миллии Маҷлиси Олии Ҷумҳурии Тоҷикистон ва Раиси шаҳри Душанбе муҳтарам Рустами Эмомалӣ ҷашни фархундаи мавлудашонро таҷлил менамоянд.

Муҳтарам Рустами Эмомалӣ ҳамчун роҳбари ҷавон, ташаббускор ва масъулиятшинос бо заҳмати содиқона ва иродаи қавӣ дар роҳи татбиқи сиёсати давлатии Ҷумҳурии Тоҷикистон фаъолияти самарабахш ба роҳ монда, дар рушди соҳаҳои гуногуни ҳаёти иҷтимоию иқтисодӣ саҳми арзишманд гузошта истодаанд. Хидматҳои шоистаи эшон, бахусус дар самти рушди пойтахти мамлакат — шаҳри Душанбе, боиси қадршиносии аҳли ҷомеа гардида, намунаи олии хизмат ба Ватан ва мардум маҳсуб меёбанд.

Имрӯз шаҳри Душанбе ба шарофати иқдомҳои дурандешона, сиёсати шаҳрсозии муосир ва тадбирҳои пайвастаи муҳтарам Раис ба маркази воқеии рушд, фарҳанг, илму маориф ва зиндагии шоиста табдил ёфта, симои он рӯз ба рӯз наву зебо мегардад. Бунёди иншооти муҳими иҷтимоӣ, роҳҳо, боғу гулгаштҳо, иншооти варзишию фарҳангӣ ва беҳтар гардидани сатҳи хизматрасонӣ далели равшани фаъолияти натиҷабахши роҳбарият мебошад.

Ба ин муносибати саид муҳтарам Рустами Эмомалиро бо рӯзи мавлудашон самимона табрику таҳният гуфта, барояшон саломатии бардавом, умри дароз, саодати рӯзгор, неруи тоза ва дар иҷрои рисолати пуршарафи давлатдорию роҳбарӣ муваффақиятҳои рӯзафзун орзу менамоем. Орзумандем, ки зери роҳбарии эшон шаҳри Душанбе ва Ҷумҳурии Тоҷикистон боз ҳам ободу пешрафта гардида, мақоми сазовори худро дар арсаи байналмилалӣ тақвият бахшанд.

Бигзор иқдомҳои созандаатон ҳамеша муваффақ, ниятҳои некатон ҷомаи амал пӯшанд ва фаъолияти пуршарафатон баҳри фардои дурахшони Ватани маҳбубамон — Тоҷикистон равона гардад.

Ҳамдиёрон ва ҳамҳизбиёни азиз!

Бо эҳсоси ифтихор ва самимияти беандоза ҳамаи Шуморо ба ифтихори таҷлили 31-умин солгарди таъсисёбии Ҳизби Халқии Демократии Тоҷикистон таҳният мегӯям. Дар тӯли се даҳсола Ҳизби Халқии Демократии Тоҷикистон ҳамчун нерӯи созанда, муттаҳидкунанда ва пешбарандаи ҷомеа собит намудааст, ки дар таҳкими рукнҳои давлатдорӣ, эҳёи арзишҳои миллӣ ва таъмини сулҳу суботи устувор нақши басо арзанда дорад.

Ҳизби Халқии Демократии Тоҷикистон сартосар ҳимоятгар аз манофеи миллӣ буда, ҳадафи асосиашро зиндагии шоистаи мардуми кишвар ва рушди самтҳои афзалиятнок ташкил медихад. Ҳизби Халқии Демократии Тоҷикистон аз ҷумлаи он аҳзоби сиёсии кишвар маҳсуб меёбад, ки дар рушду нумуи тамоми самтҳои ҳаёти ҷамъиятӣ имрӯз мавқеи назаррасро соҳиб мебошад. Албатта, дар низоми бисёрҳизбӣ дарёфти мақому ҷойгоҳи устувор ва шуҳрати ҳизб аз барнома ва оинномаи он сарчашма мегирад, ки то кадом андоза манфиатҳо ва талаботҳои ҷомеаро ҳимоят менамояд.

Маҳз сиёсати хирадмандонаи Сарвари муаззами ҳизб, муҳтарам Эмомалӣ Раҳмон ва барномаву оинномаи мушаххасу фарогир аз манофеи ҷомеа боис гардидааст, ки дар низоми бисёрҳизбӣ, ки рукни асосии ҷомеаи демократӣ маҳсуб меёбад, мақоми Ҳизби Халқии Демократии Тоҷикистон афзояд. Тӯли 31 сол мешавад, ки Ҳизби Халқии Деморкатии Тоҷикистон бо сарварии Пешвои муаззами миллат, муҳтарам Эмомалӣ Раҳмон дар амалӣ гардидани ҳадафҳои муҳиму стратегии мамлакат мавқеи меҳвариро ишғол менамояд.

Дар баробари дигар самтҳои афзалиятнок, баланд бардоштани сатҳи маърифати ҷомеа, рушди илм ва маориф ҳадафи барномавии Ҳизби Халқии Демократии Тоҷикистон ва Сарвари муаззами он, муҳтарам Эмомалӣ Раҳмон ба ҳисоб меравад. Аз барномаи пешазинтихоботии номзад ба мансаби Президенти Ҷумҳурии Тоҷикистон аз Ҳизби Халқии Демократии Тоҷикистон Эмомалӣ Раҳмон бармеояд, ки яке аз ҳадафҳои муҳимми он рушди илм ва маориф маҳсуб меёбад. Таваҷҷуҳи аввалиндараҷа зоҳир намудан ба соҳаҳои илму маориф, идома бахшидани ислоҳот дар ин самт, давра ба давра зиёд намудани маоши кормандон ва таҳкими пояҳои моддиву техникии онҳо, аз ҷумла таъминот бо технологияҳои иттилоотиву комунникатсионӣ аз барномаи Хизби Халқии Демократии Тоҷикистон ва Барномаи пешазинтихоботии номзад ба мансаби президентӣ аз ҳизби мазкур маншаъ мегирад.

Бо мақсади амалӣ намудани нуқтаҳои барномаи ҳизб ва сиёсати илмпарваронаи Пешвои миллат ҷиҳати баланд бардоштани сатҳу сифати корҳои илмӣ-таҳқиқотӣ ва роҳандозии фаъолияти таълимӣ дар ҳама зинаҳои таҳсилот, аз ҷумла бакалавр, магистратура, докторантураи PhD, ҷорӣ намудани усулҳои фаъоли таълим ва истифодаи таҷрибаи пешқадам дар раванди таҳсилот аз ҷониби Кумитаи Марказии ҳизб ва кумитаву ташкилотҳои он чорабиниҳои зиёд дар амал татбиқ гардида истодааст.

Дар ҳошияи сиёсати илмпарваронаи Пешвои миллат, муҳтарам Эмомалӣ Раҳмон бо мақсади баланд бардоштани маърифати сиёсии ҷавонон, аз ҷумла магистрантону докторантон ва тарбияи онҳо дар рӯҳияи ватандӯстӣ, худшиносӣ, ҳувияти миллӣ ва эҳтиром гузоштан ба роҳбарони илмӣ нақшаи муштараки баргузории дарсҳои кушода зери унвони "Соатҳои сиёсӣ" барои магистрантону докторантони муассисаҳои илмии Академияи миллии илмҳои Тоҷикистон ташкил карда шуд.

Академияи миллии илмҳои Тоҷикистон ҳамеша ҷонибдори ташаббусҳои созанда ва дурнамосози давлат ва Ҳизби Халқии Демократии Тоҷикистон буда, фаъолияти илмии худро дар пайравӣ ба сиёсати илмпарваронаи роҳбарияти олии мамлакат ба роҳ мемонад. Ин ниҳоди бонуфузи илмӣ на танҳо дар ҳаллу фасли масъалаҳои муҳимми илмӣ-назариявӣ ва таҳқиқоти амаливу инноватсионӣ пешсаф аст, балки ба таҳкими иқтидори зеҳнии кишвар тавассути омӯзиши масъалаҳои стратегии рушди миллӣ, таҳияи тавсияҳои илмӣ барои сиёсати давлатӣ ва ҷалби истеъдодҳои ҷавон ба муҳити илм нақши муассир дорад.

Ба ин муносибати фархунда, бароятон саломативу саодати рӯзгор ва дар фаъолияти ҷамъиятӣ ва ҳизбиатон боз ҳам муваффақиятҳои нав орзумандам. Бигузор сулҳу оромӣ, ваҳдату якдигарфаҳмӣ ва созандагию ободкорӣ дар саросари кишвар поянда бимонад.

Солгарди 31-уми таъсисёбии ҲХДТ муборак бошад!

Ҳамдиёрони азиз!

Сокинони сарбаланди пойтахт!

Ҳамаи Шуморо ба муносибати Рӯзи Парчами давлатии Ҷумҳурии Тоҷикистон, ки барои миллати тоҷик яке аз санаҳои муҳими таърихӣ маҳсуб меёбад, самимона табрик менамоям.

Парчами давлатӣ рамзи муқаддаси давлатдории миллӣ буда, се ранги пурмаънои он ҳувият, таърих ва моҳияти давлатдории тоҷиконро таҷассум мекунад.

Қабули парчами кишвар дар марҳалаи ҳассоси таърихӣ ба халқи мо нерӯи тоза бахшид, мардумро муттаҳид сохт ва барои барқарории сулҳу суботи миллӣ заминаи устувор гузошт.

Парчам эҳсоси ифтихор, ватандӯстӣ ва худшиносии ҳар шаҳрвандро бедор мекунад ва арҷгузорӣ ба он нишонаи эҳтиром ба муқаддасоти миллӣ мебошад.

Бахусус, наврасону ҷавонони сарбаланди мо имрӯз ба Парчами давлатӣ бо эҳтироми хос муносибат карда, онро рамзи осудагии Ватан медонанд ва ҳамеша мекӯшанд то дар ҳама ҷодаи фаъолият онро бо ифтихор боло бардошта, аз давлату миллати худ шарафмандона ва ба таври шоиста муаррифӣ кунанд.

Мо вазифадорем, ки зери Парчами миллӣ муттаҳид бошем, манфиатҳои миллату давлатро ҳимоя кунем, сулҳу субот ва ваҳдати миллиро тақвият диҳем ва мақому нуфузи Тоҷикистонро дар арсаи байналмилалӣ боз ҳам баланд бардорем.

Бигзор Парчами давлатӣ ҳамчун рамзи ифтихору сарбаландии миллати тоҷик ҷовидона парафшон бошад!

Бори дигар, кулли ҳамдиёрон ва ҳамватанони бурунмарзиамонро бо Рӯзи Парчами давлатиии Ҷумҳурии Тоҷикистон муборакбод намуда, ба ҳар як хонадони кишвар осудаҳоливу фаровонӣ, бахту саодат ва ба Ватани маҳбубамон сулҳу суботи ҷовидонаро таманно дорам.

Рӯзи Парчами давлатӣ муборак бод!

Ҳамдиёрони азиз, олимону кормандони гиромӣ!

Ҳамаи Шуморо ба Рӯзи Парчами давлатии Ҷумҳурии Тоҷикистон – 24-уми ноябр табрику таҳният гуфта, ба Шумо саломатӣ ва дастовардҳои нави илмию таҳқиқотиро таманно менамоям.

Парчами давлатии Ҷумҳурии Тоҷикистон дар баробари Конститутсия, Нишон ва Суруди миллӣ рамзи муқаддаси давлат ва нишонаи соҳибихтиёрии давлату миллат дониста шуда, дар мақоми худ равшангари таърих, сарнавишти миллату давлат, инъикосгари фарҳангу тамаддун ва орзуву ормони мардум маҳсуб меёбад.

Истиқлоли давлатӣ, ки нодиртарин арзиш барои миллат аст, ба тоҷикон имкон дод, ки аркони муҳимми давладории хешро бо такя ба суннатҳои неки ниёкон интихоб ва тасдиқ намоянд. Дар Иҷлосияи тақдирсоз дар баробари қабули рукнҳои дигари давлатӣ 24-уми ноябри соли 1992 Парчами давлатӣ қабул ва тасдиқ гардид. Парчами давлатии Тоҷикистон, ки аз се ранг иборат аст, матои хушку холӣ набуда, он таърих, тамаддун, фарҳанг, имрӯз ва ояндаи дурахшони миллату давлати тоҷиконро дар худ инъикос менамояд. Ин рамзест, ки номуси миллиро баланд бардошта, заминаи устувории ваҳдату ягонагии миллиро таъмин месозад.

Парчам ҷомеаро ба ваҳдат, ягонагӣ, сулҳу созиш ва меҳнати софдилона баҳри рушди босуботи кишвар даъват менамояд. Парчам ваҳдати миллиро таҳким бахшида, мондагории истиқлоли давлатиро таъмин месозад. Аз ин рӯ, зарур аст, ки дар атрофи Парчами давлатӣ муттаҳид шуда, баҳри рушду инкишофи Ватан талош варзем. Имрӯз пачами миллӣ ҳамчун рамзи ваҳдатофар миллату давлати моро дар миқёси ҷаҳон муррифӣ менамояд.

Парчами давлатии Ҷумҳурии Тоҷикистон дар замони соҳибистиқлолии кишвар бо шарофати сиёсати оқилонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон чун рамзи давлату давлатдорӣ, нангу номуси миллӣ, ҳаёти осоишта, бахту иқболи нек ва умед ба ояндаи шукуфон шинохта шуда, зери ливои худ аҳли ҷомеаро муттаҳид сохтааст. Тавре Пешвои муаззами миллат муҳтарам Эмомалӣ Раҳмон таъкид кардаанд: “Парчами давлатӣ барои мо - тоҷикон нишонаи бақои давлат, ваҳдату ягонагӣ, ҳувияти миллӣ ва беҳтарин василаи тарбияи наврасону ҷавонон дар рӯҳияи ифтихор аз давлатдории миллӣ ва ҳифзи арзишҳои таъриху фарҳанги халқамон мебошад”.

Бигзор Парчами давлатии Ҷумҳурии Тоҷикистон чун рамзи ифтихори ҷовидонии миллат ва муҳаббату садоқати сокинон ба Ватани соҳибихтиёру обод то абад парафшон бошад.

Аз фурсати муносиб истифода бурда, ҳамаи Шуморо ба Рӯзи Парчами давлатӣ самимона табрик гуфта, бароятон саломатӣ ва фаъолияти пурсамари илмию таҳқиқотиро таманно дорам.

Ҷашни Парчами давлатӣ муборак!

Ҳамдиёрони арҷманд!

Ҳамаи Шуморо ба муносибати Рӯзи Президенти Ҷумҳурии Тоҷикистон, ки бо эҳсоси баланди шукргузории миллати куҳанбунёд ва мардуми шарифи Тоҷикистон ҳамасола таҷлил мегардад, самимона шодбош мегӯям.

Ин ҷашн, пеш аз ҳама рамзи сипосгузорӣ аз ҳастию бақои давлату миллат, таҳкими истиқлолу ваҳдат, таъмини сулҳу субот ва саҳми сарнавиштсози Президенти мамлакат муҳтарам Эмомалӣ Раҳмон дар ин раванд, ба шумор меравад.

Нахустин Президенти ба таври раъйпурсии умумихалқӣ интихобшудаи Тоҷикистони соҳибистиқлол муҳтарам Эмомалӣ Раҳмон дар давраи ниҳоят мураккаби таърихӣ роҳбарии кишварро ба зимма гирифта, бо азму иродаи матин, фидокории бемисл, қалби пурмеҳру дасти сулҳовар, талошу заҳматҳои пайваста тавонистанд миллатро сарҷамъ ва давлатро пойдор нигаҳ доранд.

Муҳтарам Эмомалӣ Раҳмон ҳамчун чеҳраи барҷастаи таърихӣ дар таҳкими давлатдорӣ, барқарории сулҳу ваҳдати миллӣ, бунёди давлати соҳибихтиёр, демократӣ, ҳуқуқбунёд, дунявӣ ва ба ҷаҳониён ба таври шоиста муаррифӣ кардани арзишҳои давлатдории навини тоҷикон нақши муассиру мондагор гузоштаанд.

Таҷрибаи Тоҷикистони азиз ҷиҳати расидан ба сулҳу суботи комил, таҳкими аркони давлати ҳуқуқбунёду асосҳои ҷомеаи демократӣ, татбиқи тадриҷии ҳадафҳои стратегии миллӣ, афзоиши рӯзафзуни сатҳи некуаҳволии иҷтимоиву иқтисодии мардум,пешбариву татбиқи ташаббусҳои байналмилалӣ, муаррифии шоистаи арзишҳои миллии фарҳангии мо аз минбарҳои ҷаҳонӣбаёнгари он аст, ки интихоби шакли идоракунии президентӣ дар Тоҷикистони соҳибистиқлол қарори дурусти таърихӣ, таҳаввулбахши ҳаёти миллату тақдири давлатбуд.

Маҳз ҷиҳати дарки аҳаммияти меҳварӣ, тақвияти ғоявию ҳуқуқии ниҳоди Президент дар саросари диёри хушманзару озодаи мо санаи 16 ноябр ҳамчун Рӯзи Президенти Ҷумҳурии Тоҷикистон аз ҷониби тамоми сокинони сарбаланду ватандӯсти кишвар бо маҳбубияти том ва ҳисси арҷгузорӣ ба хизматҳои Пешвои миллат муҳтарам Эмомалӣ Раҳмон бо шукӯҳи хос ҷашн гирифта мешавад.

Бо камоли ифтихор, шумо ва ҳамватанони бурунмарзиамонро, ки ба хизматҳои бесобиқаи муҳтарам Эмомалӣ Раҳмон дар эъмори давлати амну обод арҷ мегузоранд, бо ин ҷашни пуршараф табрик гуфта, ба ҳар як фарди кишвар рӯзгори обод, фараҳмандӣ ва сулҳу суботи комил таманно менамоям.

Ба Президенти мамлакат, Пешвои маҳбубимиллат неруи афзуну умри дароз, амалишавии тамоми нияту нақшаҳои созандаашонро ҷиҳатипешрафту шукуфоии мудоми Тоҷикистони азизорзумандам.

Рӯзи Президенти Ҷумҳурии Тоҷикистон муборак!

Ҳамдиёрони азиз, олимону кормандони соҳаи илми кишвар!

Бо эҳсосу самиммияти беандоза ҳамаи Шуморо ба ифтихори Рӯзи Президенти Ҷумҳурии Тоҷикистон — ҷашне, ки рамзи эҳтиром ба хизматҳои фарзанди фарзонаи миллат, Пешвои муаззами миллат муҳтарам Эмомалӣ Раҳмон ба ҳисоб меравад, аз номи раёсати Академияи миллии илмҳои Тоҷикистон табрик мегӯям.

Тавре, ки маълум аст, Рӯзи Президент дар Ҷумҳурии Тоҷикистон на танҳо иди давлатӣ, балки рамзи таҳкими ваҳдати миллӣ, субот ва талош барои шукуфоии кишвар мебошад, ки ҳамасола дар сатҳи баланд аз ҷониби тамоми сокинони ҷумҳурӣ самимона ва бо садоқати хосса таҷлил карда шуда, дастовардҳои муҳимми кишварро дар давраи сипаригашта инъикос мекунад ва ҳамчун воситаи таҷассуми ҳувияти миллӣ ва сарвати фарҳангии халқи мо хизмат мекунад.

Рӯзи Президент аз ҷониби шаҳрвандон ҳамчун ифодаи самимии эҳтиром ба Пешвои муаззами миллат – Ҷаноби олӣ, муҳтарам Эмомалӣ Раҳмон, ки иродаи халқро барои таҳкими пояҳои истиқлол ва рушди давлатдории миллӣ ифода мекунад, самимона пазируфта шудааст.

Дар маҷмуъ, Рӯзи Президент дар Тоҷикистон ҷашни гуногунҷабҳаест, ки ҳувияти миллӣ, ҳифзу муаррифии мероси фарҳангӣ ва кӯшиши мардумро барои пойдории ваҳдат ифода мекунад. Ин рӯзест, ки шаҳрвандони Тоҷикистон садоқати худро ба арзишҳои миллӣ ва эътимоду боварии худро ба ояндаи дурахшони кишварамон изҳор мекунанд. Ин ҷашн дар руҳияи ваҳдат ва ҳамбастагӣ сурат мегирад, ки аҳаммияти нигаҳдорӣ ва пос доштани сулҳу субот дар кишварро, ки барои рушди пайваста ва таъмини некӯаҳволии шаҳрвандон зарур аст, таъкид месозад. Ин рӯз на танҳо нишонаи эҳтиром ба Президент, балки тантанаи ваҳдати миллӣ, хотираи таърихӣ ва назари нек ба ояндаи Тоҷикистони азиз мебошад.

Рӯзи Президенти Ҷумҳурии Тоҷикистон, чунонки маълум аст, ҳамчун рӯзи эътирофи нақши Сарвари давлат дар ташаккул ва рушди давлатдори миллии тоҷикон мебошад. Ин ҷашн соли 2010 ба ифтихори Пешвои муаззами миллат – муҳтарам Эмомалӣ Раҳмон, Президенти Тоҷикистон, ки давраи нави таърихи кишварро оғоз кард, таъсис дода шудааст.

Ҳамагон шоҳиди онем, ки Иҷлосияи 16-уми Шурои Олии Тоҷикистон ба раванди бунёди давлатдории миллӣ сарчашма гузошт ва абармади сиёсӣ Раҳмонов Эмомалӣ Шарифович чун вакили ҷавон ва дорои таҷрибаи баланди корӣ ба майдони сиёсат ворид гардида, Раиси Шурои Олӣ интихоб шуд. Ин абармарди таърих миллатро аз марг ва давлатро аз парокандагӣ наҷот дода, кохи боҳашамати сулҳи тоҷиконро бунёд кард, низоми давлатдории муосирро асос гузошт ва тоҷиконро чун миллати дорои забон, фарҳанг ва таърихи қадима ба ҷаҳониён муаррифӣ намуд. Аз ин ҷост, ки халқ ба ӯ унвони арзандатарин–Асосгузори сулҳу ваҳдати миллӣ-Пешвои миллатро додааст.

Воқеан Пешвои миллат муҳтарам Эмомалӣ Раҳмон тавонистанд таҷрибаи хосаеро ба ҷаҳониён дар самти ҳалли осоиштаи низоъи шаҳрвандӣ ва муноқишаҳои сиёсӣ омӯзонанд. Ба ҳаҳониён собит намуданд, ки ақли солим, ҳадафи волои ҳимояи манфиатҳои миллӣ ва бартарии манфиатҳои умумидавлатӣ нисбат ба манфиатҳои гурӯҳӣ метавонанд сулҳро дар мамлакат пойдор созанд. Хушбахтона, имрӯз Тоҷикистонро аксари давлатҳои дунё ва созмонҳои бонуфузи байналмилалӣ ҳамчун маркази сулҳу адолат мешиносанд ва ташаббусу пешниҳодҳои онро дар масъалаҳои умумибашарӣ ҳамаҷониба дастгирӣ менамоянд.

Боиси тазаккур аст, ки сарчашмаи пайдоиши институти президентӣ дар Ҷумҳурии Тоҷикистон маҳз Иҷлосияи 16-уми Шурои Олии Ҷумҳурии Тоҷикистон ба ҳисоб меравад, ки дар иҷлосияи мазкур маросими савгандёдкунӣ ва ба вазифа шурӯъ кардани Президенти Ҷумҳурии Тоҷикистон баргузор гардида буд. Мақсад аз Рӯзи Президенти Ҷумҳурии Тоҷикистон муайян кардани рӯзи 16 ноябр дар он ифода меёбад, ки ибтидо аз ҳамин рӯзи тақдирсозу муайянкунандаи рушди минбаъдаи Тоҷикистон марҳилаи нави муҳимми давлатӣ, яъне идоракунии президентӣ оғоз ёфта, Президенти тозаинтихобгардида ба иҷрои вазифа шурӯъ намудааст.

Аз ин рӯ, мо вазифадорем, ки ҳар як дастоварди Иҷлосияи ХVI-уми Шурои Олии Ҷумҳурии Тоҷикистонро ҳифз намоем, манфиатҳои умумимиллӣ-Истиқлоли давлатӣ, якдилӣ ва ҳамбастагии сокинони кишварро аз манфиатҳои шахсӣ, маҳаллӣ, гурӯҳӣ ва ҳизбӣ боло гузорем, дар пешрафти Ватани азизамон саҳмгузор бошем.

Мо бо Пешвои миллат ифтихор менамоем. Пешвои миллат ҳомии ҷавонон ва такягоҳи миллати тоҷдори тоҷик аст.

Бори дигар ҳамаи Шуморо ба ифтихори Рӯзи Президент табрик гуфта, бароятон саломатӣ, муваффақиятҳои нав ба нав, комёбиҳои илмиву эҷодӣ ва сарбаландӣ таманно намуда, ба Президенти Ҷумҳурии Тоҷикистон, Асосгузори сулҳу ваҳдати миллӣ - Пешвои муаззами миллат, муҳтарам Эмомалӣ Раҳмон саодати ҷовидониро таманно менамоям.

Муҳтарам кормандони мақомоти корҳои дохилӣ ва хизматчиёни ҳарбии Қӯшунҳои дохилӣ!

Ҳамаи шумо, инчунин, собиқадорони мақомоти корҳои дохилиро, ки дар роҳи бунёди ҷомеаи демократӣ ва ҳуқуқбунёд дар Тоҷикистони соҳибистиқлол саҳми арзанда гузоштаед, ба ифтихори ҷашни касбиатон – Рӯзи милитсия самимона табрик мегӯям.

Ҷашни касбии кормандони милитсия дар замоне таҷлил мегардад, ки кишвари мо ҳамчун давлати соҳибистиқлол ва узви комилҳуқуқи ҷомеаи ҷаҳонӣ тайи беш аз се даҳсола дар ҷодаи пешрафту тараққиёт ва бунёдкориву созандагӣ қадамҳои устувор мегузорад.

Мақомоти корҳои дохилии Тоҷикистон аз оғози соҳибистиқлолӣ то имрӯз масъулияти басо ҳассосу душвор – ҳифзи молу мулк ва ҳимояи ҳуқуқу манфиатҳои мардум, осоишу оромии ҷомеа ва мубориза бо ҷинояткориро сарбаландона иҷро карда истодаанд.

Ҳамчунин, мехоҳам бо қаноатмандӣ иброз намоям, ки кормандони мақомоти корҳои дохилӣ ва ҳайати шахсии Қӯшунҳои дохилӣ дар солҳои бисёр душвору ҳассоси таърихи навини халқи тоҷик якҷо бо дигар мақомоти ҳифзи ҳуқуқ ва сохторҳои ҳарбии мамлакат барои барқарорсозии ҳокимияти конститутсионӣ, таъмин намудани суботу оромӣ, ҳифзи тартиботи ҷамъиятӣ ва мубориза бо ҷинояткорӣ саҳми таърихӣ гузоштанд.

Кормандони милитсия, хусусан, дар солҳои нахустини истиқлол бо вуҷуди мушкилоти сангини иқтисодиву иҷтимоӣ ва норасоии шароити моддиву техникӣ вазифаи худро содиқона ба ҷой оварданд.

Вақтҳои охир мардуми сайёраро зуҳуроти хатарноку фоҷиабори терроризму ифротгароӣ, радикализми динӣ, қочоқу муомилоти ғайриқонунии маводи мухаддир, ҷиноятҳои киберӣ ва дигар ҷинояткориҳои муташаккили фаромарзӣ сахт ба нигаронӣ овардаанд.

Дар чунин шароит кормандони мақомоти ҳифзи ҳуқуқ, аз ҷумла мақомоти корҳои дохилӣ бояд зиракии сиёсиро фаромӯш насозанд, дар иҷрои вазифаҳои хизматӣ ва рисолати касбии худ, яъне ҳифзи оромиву суботи ҷомеа ва давлат, волоияти қонун ва тартиботи ҳуқуқӣ ҳамеша омода бошанд.

Ҳамзамон бо ин, таъкид менамоям, ки барои таъмин намудани фаъолияти самараноки мақомот ба сифати омодасозии кадрҳо, интихобу ҷобаҷогузории дуруст ва баланд бардоштани сатҳи касбияти онҳо, аз худ кардани техникаву технологияҳои ва омӯхтани забонҳои хориҷӣ, аз ҷумла забонҳои русӣ ва англисӣ бояд диққати махсус дода шавад.

Давлат ва Ҳукумати Тоҷикистон барои таҳкими асосҳои моддиву техникии мақомоти корҳои дохилӣ ва Қӯшунҳои дохилӣ, тарбияи кадрҳои баландихтисос, ба хизмат ҷалб кардани мутахассисони ба талаботи замони муосир ҷавобгӯй ва беҳтар намудани шароити зиндагиву хизмати ҳайати шахсӣ таваҷҷуҳи махсус зоҳир менамояд.

Кормандони милитсияи тоҷик бояд доимо дар ёд дошта бошанд, ки оромиву осоиштагии диёри азизи мо бар ивази ҷоннисорӣ, матонату шуҷоат ва иродаи қавии ҳазорон нафар сарсупурдагони роҳи истиқлолу озодӣ ба даст омадааст.

Таъмин намудани оромиву субот ва ҳаёти осудаи мардуми кишвар аз ҳисси баланди масъулияти шахсӣ ва қобилияту маҳорати касбии ҳар яки онҳо вобастагӣ дорад.

Ман ба қудрату тавоноӣ, далериву мардонагӣ ва садоқати кормандони милитсия, дигар мақомоти ҳифзи ҳуқуқ ва сохторҳои низомӣ ба давлату миллат, сарзамини муқаддас ва Ватани аҷдодӣ итминони комил дорам.

Бовар дорам, ки шумо ба савганди худ ҳамеша содиқ мемонед, вазифаҳои хизматӣ ва рисолати муқаддаси худро минбаъд низ содиқонаву сарбаландона иҷро мекунед.

Бори дигар тамоми кормандони милитсияи тоҷик ва ҳайати шахсии Қӯшунҳои дохилии Вазорати корҳои дохилиро ба ифтихори Рӯзи кормандони милитсия самимона табрик гуфта, ба ҳамаи шумо тансиҳатӣ ва дар кору зиндагиатон барору комёбӣ орзу менамоям.

Ҷашни касбӣ муборак бошад, ҳомиёни қонунияту тартибот ва фарзандони содиқи Ватан!

https://www.president.tj/event/news/53646

Ҳамдиёрони азиз, кормандони мақомоти корҳои дохилӣ!

Ҳамасола 10- ноябр дар саросари кишвар Рӯзи кормандони милитсия таҷлил мегардад. Бо фурсати муносиб ба тамоми кормандони мақомоти корҳои дохилӣ, родмардони ватан, ки дар роҳи ба даст овардани сулҳу субот, Ваҳдати миллӣ, Истиқлолияти давлатӣ саҳми арзишманд доранд иди касбияшонро табрику таҳният мегуям.

Воқеан ҳам фаъолияти кормандони мақомоти корҳои дохилӣ дар тӯли солҳои Истиқлолияти давлатӣ яке аз пояҳои муҳими таҳкими амният, субот ва оромии ҷомеаи мо ба шумор меравад. Саҳми Шумо, ҳомиёни содиқи қонун, дар таъмини тартиботи ҷамъиятӣ, мубориза бо ҷинояткорӣ ва ҳифзи ҳуқуқу озодиҳои шаҳрвандон назаррас мебошад.

Имрӯз, милитсияи тоҷик ҳамчун ниҳоди пурэҳтиром, касбӣ ва боэътимоди давлатӣ ҷойгоҳи хоси худро дар ҷомеа соҳиб аст. Ин ҳама дастовардҳо натиҷаи заҳмату садоқат, фидокорӣ ва иродаи устувори ҳар як корманди мақомоти корҳои дохилӣ мебошанд.

Бо ифтихор метавон гуфт, ки кормандони милитсияи кишвар дар баробари иҷрои вазифаҳои хизматии худ, инчунин дар таҳкими Ваҳдати миллӣ ва ҳифзи манфиатҳои давлату миллат нақши созанда доранд. Ҳар як қадами ҷасуронаи Шумо, ки бо эҳсоси баланди ватандӯстӣ ва садоқат ба халқу Ватан анҷом мегирад, шоистаи қадрдонӣ ва эҳтиром аст.

Пешвои муаззами миллат муҳтарам Эмомалӣ Раҳмон борҳо дар суханрониҳои хеш иброз доштаанд: "Мақомоти милитсия тибқи таъиноти худ ҳамеша вазифаҳои мураккабу муҳими давлатиро дар самти таъмини тартиботи ҳуқуқӣ ва таҳкими қонуният ба сомон мерасонанд. Баъди ба даст омадани истиқлолияти давлатӣ милитсияи тоҷик ҳамеша дар сафи пеши мубориза бо унсурҳои ҷинояткор, ки халалдор намудани хаёти осоиштаи сокинони мамлакат, поймол намудани ҳуқуқ ва озодиҳои инсон, инчунин заиф гардонидани пояҳои давлатдориро мехостанд, қарор гирифта буд".

Бо дарки ин суханҳо мебояд қайд намуд, ки пойдории имрӯзаи давлати тоҷикон ҳамчун кишвари демокративу ҳуқуқбунёд ва озоду ягона аз масъулият ва шуҷоатмандии кормандони милитсия ва натиҷаҳои судманди фаъолияти ин мақомот вобастагии амиқ дорад.

Бори дигар тамоми кормандони милитсияи кишварро бо иди касбиашон табрику таҳният гуфта, дар адои вазифаи пуршарафу пурмасъулияташон ба нафъи давлат ва халқи кишвари азизамон Тоҷикистон муваффақиятҳои беназирро таманно менамоям.

Иди касбӣ муборак!

Ҳамдиёрони азиз, олимону кормандони соҳаи илми кишвар!

Ҳамаи Шуморо ба ифтихори яке аз ҷашнҳои муҳими миллӣ — Рӯзи Конститутсияи Ҷумҳурии Тоҷикистон самимона табрик гуфта, барои ҳар яки Шумо тандурустӣ, бахту иқболи нек, фаъолияти пурсамари илмӣ ва пешрафт дар тамоми ҷабҳаҳои зиндагӣ орзумандам.

Лозим ба ёдоварист, ки шаҳрвандони Ҷумҳурии Тоҷикистон ҳамчун сокинони давлати соҳибихтиёр санаи 6-уми ноябри соли 1994 санади тақдирсози худ - Конститутсияи Тоҷикистонро бо роҳи раъйпурсии умумихалқӣ қабул намуданд.

Инак, 31 сол аст, ки мардуми шарифи Тоҷикистон сарнавишти худро тибқи муқаррароти ин ҳуҷҷати воқеан тақдирсози кишвар муайян намуда, самтҳои муҳимми ҳамаи соҳаҳои зиндагиашонро пеш мебаранд.

Қабули Конститутсияи Ҷумҳурии Тоҷикистон, ки соли 1994 ба вуқуъ пайваст, аз ҷумлаи дастоварди бузурги миллати тоҷик ба шумор меравад. Конститутсия тавонист дар рушду инкишофи ҷомеа, пешрафти соҳаҳои муҳимми иқтисодиёти мамлакат нақши арзишманд дошта бошад. Тавре Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зикр намуданд: “Конститутсияи Ҷумҳурии Тоҷикистон инъикоскунандаи воқеияти даврони истиқлолу озодии Ватан, рушди давлат ва пешрафти миллати тамаддунсози тоҷик мебошад”.

Ба ҳамагон маълум аст, ки қабули Конститутсия ба давраи ниҳоят мураккаби таърих, авҷи даргириҳои сиёсӣ, доман паҳн кардани беқонуниву беҳокимиятӣ рост меояд. Заминаи асосиро дар қабули Конститутсия баргузор намудани Иҷлосияи 16-уми таърихии Шурои Олии Ҷумҳурии Тоҷикистон гузоштааст. Интихоби роҳбарияти нави мамлакат дар ин иҷлосия барои ҳалли масъалаи муҳимтарин, яъне таҳия ва қабули Конститутсия иродаи уавиро ба миён овард.

Бо заҳмату талошҳои пайвастаи фарзанди фарзонаи миллат, Пешвои муаззами миллат муҳтарам Эмомалӣ Раҳмон Конститутсияи Ҷумҳурии Тоҷикистон қабул гардид, ки пояҳои давлатдориро устувор намуда, роҳи минбаъдаи таҳким ва пешрафти онро муайян кард. Конститутсия барои ҳифзи истиқлол, аз оташи ҷанги таҳмилии шаҳрвандӣ берун овардани ҷомеа, барқарор намудани фаъолияти сохторҳои давлатӣ, таъмин намудани амнияти миллӣ, тартиботи ҷамъиятӣ, мустаҳкам кардани заминаҳои сиёсиву ҳуқуқӣ, иҷтимоиву иқтисодӣ ва фарҳангии давлат шароити мусоиди ҳуқуқиро фароҳам овард.

Ҳамдиёрони азиз, донишмандони арҷманд!

Барои пос доштани муқаддасоти миллӣ, аз ҷумла Конститутсия бояд ҳар як шаҳрванди ба ору номуси миллат дорои донишҳои сиёсиву ҳуқуқӣ бошад ва зиракии сиёсиро аз даст надиҳад. Маҳз дар ҳамон маврид мо метавонем ин озодиву оромӣ, сулҳу суботи сиёсӣ, ки Конститутсия кафолат додааст, ҳифз намоем, ки агар худ дорои донишҳои сиёсиву ҳуқуқӣ ва зиракии сиёсӣ бошем.

Дар заминаи Конститутсия дар ҷомеа сулҳу оромӣ, суботи комили сиёсӣ, ваҳдату ҳамдигарфаҳмӣ, рушди устувори босуръати ҳамаи соҳаҳои ҳаёти ҷомеа, зиндагии осудаи шаҳрвандон, эътимоди онҳо ба ояндаи дурахшон, нуфузу обрӯи Тоҷикистон дар арсаи байналмилалӣ таъмин гардид.

Мо итминони комил дорем, ки Конститутсияи Ҷумҳурии Тоҷикистон дар баробари мусоидат дар рушди ҳама самтҳои ҷомеа ба рушду такомули илми кишвар ва заминаи мустаҳкам гузоштан барои таҳқиқотҳои илмӣ, ҳамчунин вусъат бахшидан ба таҳияи асарҳои илмии сатҳи байналмилалӣ ва ба ин васила боз ҳам баланд гардидани нуфузи олимон дар ҷумҳурӣ ва берун аз он мусоидат хоҳад кард.

Бовар дорам, ки Шумо, аҳли илму маърифат, бо заҳмати содиқона ва тадқиқоти илмии созандаатон ба таҳкими пояҳои давлатдории миллӣ, пешрафти соҳаҳои иқтисодиву иҷтимоӣ ва боло бурдани нуфузи илмии Тоҷикистони соҳибистиқлол дар арсаи байналмилалӣ ҳиссаи шоиста мегузоред.

Бори дигар ҳамаи Шуморо бо Рӯзи Конститутсияи Ҷумҳурии Тоҷикистон муборакбод гуфта, ба Шумо ва аҳли оилаатон сулҳу оромӣ, саодати хонаводагӣ, илҳоми эҷодӣ ва муваффақиятҳои нав таманно дорам.