Шурӯъ аз моҳи апрели соли 2024 сомонаи Раёсати Академияи миллии илмҳои Тоҷикистон бо талаботи нав, тарҳи замонавӣ ва имкониятҳои васеи иттилоотӣ фаъолият намуда, рӯз то рӯз доираи хонандагону корбарони худро васеъ мегардонад. Бо такя ба таҳлили омории воридшавӣ, маълум гардид, ки то имрӯз сомонаи расмии Академия аз ҷониби корбарон ва муҳаққиқон аз 136 давлати ҷаҳон пайгирӣ мешавад, ки ин нишондиҳандаи баланд ва шаҳодати эътибору нуфузи илмии кишвар дар арсаи байналмилалӣ мебошад.
Ин иқдом натиҷаи татбиқи сиёсати иттилоотии Академияи миллии илмҳо дар самти баланд бардоштани шаффофият, таъмини дастрасӣ ба иттилооти илмӣ, нашри навгониҳо, эълонҳо, дастовардҳои олимон ва дигар маълумоти муҳими соҳа мебошад. Бо татбиқи стандарти нави сохт ва тарҳ, сомона имконият медиҳад, ки марказҳои илмӣ, институтҳо, барномаҳои тадқиқотӣ, маҷаллаҳои илмӣ ва бойгонии электронии Академия ба таври қулай, дақиқ ва дастрас пешниҳод шаванд.
Мутобиқсозии сомона ба меъёрҳои байналмилалӣ, пешниҳоди маълумот бо се забон (тоҷикӣ, русӣ ва англисӣ), афзоиши маводи иттилоотӣ ва пайвастшавӣ ба шабакаҳои иҷтимоӣ аз омилҳои асосии зиёд гардидани таваҷҷуҳи ҷомеаи илмии ҷаҳонӣ ба ҳисоб меравад. Инчунин, нашри мунтазами хабарҳо дар бораи конференсияҳо, ҳамоишҳои илмӣ, ҳамкориҳои байналмилалӣ ва дастовардҳои олимони кишвар ба болоравии рейтинги сомона мусоидат кардааст.
