Ба ҳамагон маълум аст, ки санаи 28 декабри соли 2024, Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ироа гардид, ки дар он самтҳои асосии сиёсати дохиливу хориҷии мамлакат барои давраҳои оянда муайян гардида, оид ба пешбурди сиёсати хориҷӣ ва таъмини пешрафти соҳаҳои иқтисоду саноат, энергетика, роҳу нақлиёт, илму маориф ва дигар соҳаҳо вазифаҳои мушаххас ба миён гузоштанд.
Пешвои миллат ба илму маориф ҳамеша таваҷҷуҳи махсус зоҳир намуда, соҳаи мазкурро асоси рушду пешрафти кишвар мешуморанд. Бо таваҷҷуҳ ба ин масъала Пешвои миллат муҳтарам Эмомалӣ Раҳмон ҳамеша дар суханрониҳои худ ба илму маориф ва татбиқи технологияҳои нав дар ҷомеа таъкид мекунанд. Илова бар ин, ба таълиму тарбияи ҷавонон ва дастрасии онҳоро ба имтиёзҳои бештар зарур мешуморанд. Пешвои миллат маорифро яке аз роҳҳои асосии ба даст овардани муваффақият ва пешрафти шахс ва ҷамъият ҳисобида, ба ҷавонон тавсия медиҳанд, ки ба таҳсил ва омӯзиши илмҳои муосир, истифодаи технологияҳои нав ва инноватсия дар рушди кишвар аҳамияти аввалиндараҷа диҳанд.
Сарвари давлат ба таҳсили баландсифат ва омода намудани мутахассисони дорои ихтисосҳои муосир аҳамияти махсус дода, таъкид менамоянд, ки мутахассисони ҷавон бояд барои рушди иқтисодӣ ва иҷтимоии кишвар саҳми худро гузоранд. Майлу рағбати ҷавонон ба таҳқиқот ва инноватсия дар соҳаҳои гуногуни илм торафт густариш ёфта, татбиқи он дар марказҳои таҳқиқотӣ, саноат ва ҳамкории байналмилалӣ дар соҳаи илм амалӣ мегарданд. Илм асоси тафаккури пешрафта ва ҳалли мушкилоти ҷомеа буда, бо ёрии илм ва маълумот метавон ба муқобили ҳалли ҳамаи мушкилот роҳ ёфт.
Тавре Пешвои миллат дар Паёми худ ба Маҷлиси Олӣ изҳор доштанд: «Ҳукумати мамлакат ба рушди соҳаи маориф таваҷҷуҳи аввалиндараҷа медиҳад. Бо вуҷуди корҳои то имрӯз дар соҳаи маориф амалигардида, ба Ҳукумати мамлакат, Вазорати маориф ва илм ва роҳбарони мақомоти иҷроияи маҳаллии ҳокимияти давлатӣ супориш дода мешавад, ки бо дарназардошти афзоиши аҳолӣ ва зиёд гардидани шумораи кӯдакону наврасон тадбирҳои мушаххас андешанд. Яъне дар панҷ соли оянда бо истифода аз ҳамаи сарчашмаҳои маблағгузорӣ ва бо дарназардошти ҳадафи гузошташуда барои фарогирии 50 фоизи кӯдакони синну соли томактабӣ бунёди 800 муассисаи таҳсилоти томактабӣ ва беш аз 1000 муассисаи таҳсилоти умумиро таъмин намоянд. Имрӯз дар соҳаи маорифи мамлакат ҳашт барномаи давлатӣ ва ду стратегияи дарозмуддат татбиқ шуда истодааст, ки ба рушду инкишофи таълиму тарбия, амалигардонии ислоҳоти соҳа, дастгирии мактабу омӯзгор, таълифи китобҳои дарсии насли нав ва такмили мазмуну мундариҷаи таҳсилот мусоидат менамояд».
Сарвари давлати мо ҳамеша ба тавсия ва дастгирии илм, маориф ва технологияҳои нав дар Тоҷикистон аҳамияти зиёд медиҳанд ва онро яке аз роҳҳои асосии рушди кишвар мешуморанд. Инчунин ба иқдоми рушди таҳсилоти касбӣ ва техникӣ дар кишвар аҳамияти ҷиддӣ дода, таъкид менамоянд, ки ин навъи таҳсилот бояд ҷавобгӯйи талаботи бозори меҳнат бошад ва барои омода намудани мутахассисони баландихтисос хизмат намояд.
Ҳамзамон бо ин, Президенти кишвар ба аҳамияти рушди илм дар пешрафти соҳаҳои кишоварзӣ ва саноат таваҷҷуҳи махсус зоҳир менамоянд. Татбиқи технологияҳои пешрафта ва дастовардҳои илмӣ метавонанд ба баланд бардоштани ҳосилнокии зироат дар соҳаҳои кишоварзӣ ва сифати маҳсулот дар саноат мусоидат намуда, метавонанд барои таъмини намудани амнияти озуқаворӣ ва саноатикунонии босурати кишвар заминаи устувор гузоранд. Аз олимон ва мутахассисонӣ кишвар даъват ба амал оварданд, ки ба таҳқиқоти амалии илмию истеҳсолии худ диққати бештар диҳанд ва ба рушди соҳаҳои ҳаётан муҳим саҳмгузор бошанд.
Ба таъкиди Президенти Ҷумҳурии Тоҷикистон муҳтарам Эмомалӣ Раҳмон рушди ҳамкориҳои байналмилалӣ дар соҳаи илм, робитаҳо бо марказҳои илмии хориҷӣ, иштирок дар лоиҳаҳои муштарак ва баррасии масъалаҳои илмии ҷаҳонӣ ҳамчун як қисми стратегияи таҳқиқотӣ ва инноватсионӣ барои Тоҷикистон муҳим арзёбӣ мегардад.
Дар ин замина, мо на танҳо дар самти таҳсилоти миллӣ, балки дар самти таҳсилоти байналмилалӣ низ ба дастовардҳои бузурги илмӣ бояд ноил гардем. Маориф ҳамчун асоси рушди иқтисодӣ ва иҷтимоии кишвар, ба баланд бардоштани сифати таҳсил ва фароҳам овардани шароити мусоид барои омӯзиши илмҳои табиӣ, дақиқ ва риёзӣ имкон фароҳам меорад.
Роҳбарияти давлату Ҳукумат ҳамарӯза талош меварзанд, ки мизони сифати таҳсилро бо истифода аз таҷриба ва навоварӣ дар соҳаи илм баланд бардошта, бунёди муассисаҳои таҳсилоти олӣ, рушди маориф ва дастгирии омӯзгоронро боз ҳам беҳтару хубтар ба роҳ монад.
Дар партави ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мо ҷавонон имкони бештари аз худ намудани дониш ва малакаҳои заруриро дошта, баҳри рушди давлат ва ҷомеаи бо савод саҳми хешро гузорем.
Ҳаким Тиллозода - мудири сектори илмӣ-таҳқиқотии Филиали Агентии амнияти ХБРЯ-и АМИТ дар вилояти Суғд
ОЛИМОНИ АКАДЕМИЯИ ИЛМҲО ВАЗИФАДОРАНД, КИ ДАР ИҶРОИ СЕ ҲАДАФИ СТРАТЕГИИ ДАВЛАТ – ТАЪМИНИ ИСТИҚЛОЛИЯТИ ЭНЕРГЕТИКӢ, РАҲОӢ АЗ БУНБАСТИ КОММУНИКАТСИОНӢ ВА ҲИФЗИ АМНИЯТИ ОЗУҚАВОРИИ МАМЛАКАТ НАҚШИ ФАЪОЛОНА ДОШТА БОШАНД.
